收費台新頻道「造褔球迷」
夏日球驗客：法甲躉唔該畀錢

有朋友向我求大俠報料，話收費台最近開咗四個新台，包括TV5（第50台），可以睇到法國足球比賽，絕對係法國足球躉嘅喜訊。要睇呢幾個新頻道，收費台基本用戶每個月要再畀一百二十幾蚊，而非基本用戶要畀一百六十幾蚊。
呢個頻道本來以鬼佬作為吸納對象，但唔少本地賭仔都鍾意玩法國波，所以有一定市場。再講，法國假假哋都係歐洲主要聯賽之一，年年都出產好球員加盟其他聯賽，邊個敢話無料到？好似巴西細哨朗拿甸奴同阿根廷加拿度呢啲球星都響法國打躉。講到價錢，如果有直播，肯定有唔少人「落搭」啦！

巴里斯等食「無情雞」
富咸班主阿法耶茲話決定搵巴里斯做總監，本來就係一個實驗，重話實驗次次都唔成功，似暗示請巴里斯食無情雞嘅日子愈嚟愈近。呢位前意大利國腳退休後響AC米蘭做青年軍教練同埋行政工作頭頭是道，今次響爭權戰輸畀富咸領隊泰簡拿，真係失威囉。

俄傳媒爆舒夫真高詐傷
俄羅斯傳媒前日爆料話舒夫真高向AC米蘭虛報受傷，目的係想會方放佢返烏克蘭踢友賽。我求大俠覺得𠵱家AC前鋒爭位激烈，舒夫真高博唔撈咩。俄羅斯傳媒係咪吹水，呢一兩日就知啦。

李華度搏命保方「騰雞」
我求大俠不嬲都話李華度係世界仔，前日佢響貝盧斯科尼盃首次替AC米蘭，表現好搏，球迷應該收貨。祖記龍門保方賽後話李華度每次攞波想起腳時，都搞到佢騰騰震。喂，聽講你係最高身價龍門喎，唔係真係咁騰啩？