藍籌除息
一味窩輪：恆指Put輪有作為

個市窄幅波動，落唔到去邊，亦上唔到去邊，形勢係略為偏淡。期指低水，主要係反映幾隻大藍籌就快除息，同代表個市睇升睇跌嘅關係唔係咁大。
滙豐（005）明日除息1.60元，恒生（011）今個禮拜五除息2.10元，中電（002）下禮拜五除息38仙，3大藍籌共除息200億，代表恒指唔見73點。恒指昨收10246，個幾禮拜後若然實際冇升冇跌，恒指理論上係10173。
藍籌除息拖低恒指（期指先行低水反映），恒指Put輪會有啲着數。最理想對象係9369，現價36仙，表面上溢價2.4%，槓桿率5.7倍，計埋3大藍籌除息因素，實際溢價得1.7%，隻輪年底到期，計埋一郭（郭炳湘）兩李（李嘉誠、李兆基）等股份除中期息，實際溢價更低。

留意個別石油Call輪
石油股跑贏大市，中海油（883）升25仙，收11.35元，創歷史新高。中石化（386）半年賺少4成半，亦升4仙。
留意相關石油Call輪，中海油Call輪揀9275，中石化Call輪揀9062，後者明年1月至夠鐘，有負溢價2.1%㖭，就算扣埋正股兩仙人民幣股息，隻輪都係負溢價。
章　盛