雖然中秋重有個多月至到，不過應節水果水晶梨則已經上市，剛搵到嘅係我哋祖國出產嘅水晶梨，Size比日本水晶梨略細，但就相當抵食，以同樣價錢十蚊，只可以買一個日本水晶梨，但就買到三個中國水晶梨。中國水晶梨味道雖然稍淡，但同樣多汁。
$10/3個
各大果檔有售
釀蟹蓋係一樣幾精緻嘅菜式，要喺屋企整就比較麻煩。不過我肥師奶咁精靈，當然有辦法化繁為簡。其實喺凍肉舖可以買到已經釀好嘅蟹蓋，返屋企放入多士焗爐焗一陣，又或者放入鑊內，加蓋收細火焗一陣就成為香噴噴嘅菜式。𠵱家釀蟹蓋都有獨立包裝出售，食幾多件整幾多件，更加方便衞生。
約$48/磅
凍肉舖有售
仙草係台灣嘅叫法，即我哋所稱之嘅涼粉草，有清熱解毒功效，家陣都唔係好多地方可以飲到仙草呢樣飲品。呢款方便裝仙草蜜，加有蜂蜜成份，令味道更清香，而且內裏重有粒粒嘅仙草凍，一邊飲嘅同時重可以一邊有嘢咀嚼吓，雙重口感，係唔錯嘅選擇。
$5/罐
city'super有售