繼$8可以買到個麖皮手袋、先施玩$9一支Parker筆之後，今次呢個劈價場更玩$98大清貨。全場超過200件貨品一律以$98出售，而且全部係行貨，主打樂聲牌專業按摩器、皇冠鴻運扇等。另外，聲寶新抵港嘅錄影機同Fax機亦以超筍價發售，預計反應激烈，有心掃貨就要早啲去排隊啦！
記者：張穎倫
攝影：周旭文
ImageGirl：Kiji
大家人工愈嚟愈少，工作量卻有增無減，真係骨都噴火。若然等班「問米」局長諗絕世好橋的話，倒不如搵呢個專業按摩器鬆弛吓冇咁嬲！佢採用獨特曲桿形設計，比一般垂直設計，更適合按摩頸膊位置，配合2種速度調節，無論利用滾輪按摩關節，定係用骨槌消除骨火，都可以令你消消氣。最抵係通街賣緊$298，家陣平足$200，絕對抵用！
型號：樂聲EV-292
限售：10
街價：$298
一口價：$98
用開法國萬能牌嘅用家，都會留意到前排佢哋更換咗香港代理，怕冇咗保養維修。不過，呢個介乎新、舊代理之間嘅格仔餅機，一樣可以得到新代理嘅保養，等你可以安心做件格仔餅畀小朋友食，呢部機一次過可以做2件格仔餅，再加埋650W強大火力，話咁快就可以焗好。其坑紋質料亦易於清潔，唔使媽咪洗餐死！
型號：萬能牌BK5
限售：10
街價：$300
一口價：$98
唔少風扇開着後都比較嘈，唔夠寧靜。所以呢部採用靜音設計嘅12吋座地鴻運扇，都幾啱使，夠靜之餘，360度回轉嘅雙轉向風盤，令佢送風範圍特別廣闊。再加上皇冠出開嘅鴻運扇出名耐用，趁平入貨絕對明智！
型號：皇冠KYT-30
限售：10
街價：$280
一口價：$98
家陣生活緊張，無論喺公司定返到屋企，都被沉重嘅壓力迫得喘不過氣來，唔想谷爆，希望呢個翠兒阿寶空氣清新香薰機可以幫到你。佢唔單止可以辟除煙味，以至各種臭味，除咗附送嘅一包香薰珠外，更可以換上其他香薰珠，以消除精神緊張，令心境平復。
型號：無
限售：30
街價：$180
一口價：$98
一見到盒面嘅阿諾舒華辛力加同步步高呢個著名國產牌子，咪以為又有新DVD機推出。今次佢哋主攻卡拉OK雙咪套裝，全咪過半採用金屬製造，耐用之餘，亦可提高保真度同擴闊頻響範圍，令你嘅聲線以最直接嘅方法輸出，唱K包保唔會變怪聲。
型號：步步高UD-888
限售：20
街價：$200
一口價：$98
近排玩數碼相機、DV嘅拍友愈嚟愈多，唔少人都想配番個原廠器材袋襯番一Set，但去代理配，隨時收你二、三百元。今次有齊Sony、Nikon、Olympus等多個牌子的器材袋，款式太多未能盡錄，但小記見到最多人玩嘅PC9、COOLPIX5000、C-40ZOOM嘅原裝袋都可以搵到。
型號：無
限售：30
街價：$200-$300
一口價：$98
其他筍貨
嚟咗香港個零月嘅聲寶6磁頭麗音錄影機，憑住煞食嘅按鍵排列同冰藍顯示屏，一到港已成為唔少人換機嘅對象。話晒有齊國際線路、G-Code等多種Function，更有埋S-VHS影帶播放功能，極之煞食。最緊要係影像清晰度已完全拋離舊款嘅VC-VH975W，成為新機之中質素最靚嘅機款之一。
型號：SharpVC-AH975W
限售：30
街價：$1,580
一口價：$1,230
如果你試過用開嘅熱感紙Fax機，因為印出太淺、太朦嘅傳真，而令你錯失重要資料的話，呢部採用普通紙嘅Fax機就應該啱你使。事關普通紙印出嘅傳真明顯比熱感紙清晰一大截，最正係記憶體高達24頁，比一般Fax機至少多7頁，佢更可以當影印機同電話用，又有埋來電顯示，絕對一機多用。
型號：SharpFO-P600
限售：30
街價：$1,650
一口價：$1,250
$5一盒Panasonic180分鐘錄影帶，真係平到不得了，而且有埋防霉功能，耐用程度非常高，畫質點都靚過VCD。放工放得晏經常追唔到電視劇，不妨趁平入貨，錄低想睇嘅電視劇，放工就可以慢慢睇啦！
型號：PanasonicNV-E180HQ
限售：30
街價：$15
一口價：$5
香港電器優惠
協會劈價場
地址：旺角通菜街1L號威達商業大廈6字樓609室
開倉日期：即日起至9月2日
營業時間：
星期一至六 9:30am-6:00pm
星期日及公眾假期休息
查詢電話：
23594628
23889190