無綫《2002全球華人新秀大賽》前晚喺電視直播，由於今年英皇同無綫合作，所以唱片公司派出旗下嘅歌手，好似容祖兒（Joey）、陳奕迅（Eason）、王傑、陳冠希同二人女子組合Twins做表演嘉賓。
經過一輪激戰，就由十九歲嘅吳浩康攞到「金咪大獎」，年僅十七歲嘅羅寶欣攞到「完全自我表現獎」同「觀眾至愛人氣獎」，而同樣係十七歲嘅王嘉敏就得到「最具新人風采獎」。
英皇老闆楊受成前晚都有去捧場，佢喺新秀未開始嘅時候，見到Twins坐喺化妝間睇住自己嘅音樂特輯《一Twins零一夜》，楊受成行過都有睇，蔡卓妍（阿Sa）重話：「佢（指楊受成）講咗好！好！好！分開三次講。」
Eason同Joey前晚拍檔一齊做嘉賓司儀，佢哋表現中規中矩。Eason話：「同新人合唱，自己感覺後生咗，多啲新人都好，唔使打開份報紙又係Twins，又係千嬅，又係霆鋒，應該百花齊放。」
朱慧珊主持一個節目，叫做《慧珊時尚坊》，最近連續幾集都係介紹靚車，例如介紹好多明星都好鍾意揸嘅名貴跑車法拉利，好似謝霆鋒、黎明、郭富城同古天樂都有，朱慧珊就試揸過，佢噚日喺廣播道話：「呢架係半自動，比我想像中易控制，我哥哥都有一部，但係就冇揸過，今次都係第一次揸。」
周華健早前俾人入稟追討一千三百萬。上星期六，周華健本來因為巡迴演唱有合約在身，唔可以出席其他演唱會，但係為咗賀滾石唱片公司周年慶典，亦唔理合約堅持去馬來西亞出席「馬滾10周年」活動，而周華健更用國語語帶雙關話：「要不然告我吧！」
丁菲飛好似好耐冇見，究竟佢去咗邊？原來佢最近就去咗廣州，幫馬爹利做巡迴迷你演唱會，重有就係表演佢最耍家嘅拉二胡。點知今次演唱會就搞到丁菲飛鬼死咁感動，原來譚詠麟飛去寧波捧場支持佢，於是丁菲飛就即場用二胡拉咗一首《遲來的春天》送畀譚校長。
薛家燕（好姨）有份演嘅無綫劇《皆大歡喜》，改咗喺八點半播後，收視平均有二十七點，大約有一百七十萬人收睇。
好姨噚日喺電視城話因為收視好，遲啲會搞慶功宴。好姨重話日前拍咗場發水腫嘅戲，為咗套劇要喺三十度高溫着棉襖，又要咬住棉花，好辛苦。
日前有報道指苑瓊丹所投資嘅穴位按摩治療中心生意欠佳，苑仔噚日喺電視城開工時澄清，佢話：「完全係失實嘅報道，按摩治療中心試過一日最高紀錄有八十幾個客人，生意都做唔晒，重話我開分店成泡影，我一定會開得成，不過會係稍後嘅事。」