田少隻愛犬BoBo咬親人，雖然只係輕傷，但係田少都猛咁對八方話唔好意思。田少噚日覆八方，講出當時嘅實況，原來個保安公司嘅工人已經嚟過幾次，隻狼狗應該認得佢，點知都係咬咗個工人隻腳一啖，個工人後來覺得有小小痛，為安全起見，都係去醫院驗吓好。
田少話，BoBo係一隻警犬，係警隊領養返來，隻狗女平日好乖好聽話，今次係意外，而且BoBo一出世就打晒針，應該無事。田少笑言，住咁大間屋，養幾隻狗都唔夠，所以就請咗一個啹喀兵，幫佢做保安。不過經過呢件事，田少都話要小心啲，當然賠醫藥費就唔少得。
講開做行會成員，呢輪行會放假所以輕鬆啲，田少兩夫婦已定咗九月初去地中海坐郵船玩，歐洲水浸影響唔到佢嘅行程，田少話最近呢幾年都係咁，真係富貴。不過，田少會喺九月二十四號前趕返香港，開行政會議喎。
傳真︰2623-9278
電郵︰