八方噚日收到一頁訃聞，帶畀港人許多歡樂嘅海洋公園，今次傳來傷心嘅消息──最早期搬入海洋公園嘅樽鼻海豚Wiki，同病魔搏鬥咗三個禮拜，終於要離開我哋。Wiki享年三十三，殺害佢嘅兇手係一種名叫類鼻疽嘅細菌。
「我們將會永遠懷念佢。」幾個禮拜以來一直陪住Wiki，勇戰死神嘅海洋公園動物及教育總監蔣素姍話，Wiki係海洋公園第一批海豚，十五年前加入海洋劇場大家庭，參與表演，可以話同無數香港市民一起成長，見證海洋公園嘅轉變。
上月尾開始，工作人員察覺到Wiki委靡不振，幾星期以來，不斷觀察同治療，可惜Wiki年事已高，病菌已經破壞咗佢嘅肝臟同肺部，返魂乏術，喺兩日前正式宣告不治。隨住Wiki過身，海洋公園𠵱家重剩番十七隻海豚。
驗屍報告話，Wiki係受類鼻疽菌感染，引致肝臟衰竭同肺部併發症而死亡。類鼻疽係一種土壤細菌，喺東南亞、北澳洲同南中國海岸都幾普遍，年幼及年長嘅人類或動物都易受感染，尤其係喺季候風、颱風同暴雨頻密嘅季節最多發生。海洋公園噚日通知咗漁農自然護理署，以便進行詳盡解剖同分析報告。
傳真︰2623-9278
電郵︰