恒指上周升250點，收10265，滙豐（005）有1.75元進帳。近期，滙豐跑贏大市，叻過好多大藍籌，但上到90.25元呢個位，距離7月高位91.50元已經有限，再升嘅水位唔多。
滙豐有隻末日Call輪9184，今個月28日到期，有負溢價1.7%，槓桿率16.7倍。有負溢價可以代表抵買，但亦可以代表正股再升已經冇乜水位，或者有回頭機會。另1個原因，係正股中期息1.6元喺隻輪夠鐘之前除息（後日除息），滙豐除息價88.65元，隻輪實際有輕微溢價0.1%，並唔係表面上嘅負溢價1.7%，揸隻輪冇着數到。
滙豐除息前，話唔埋有搶息行動，搶完息之後回落，可以諗吓若然呢一兩日滙豐再升，搵啲滙豐Put輪埋手。
滙豐Put輪最活嘅係9234，但買唔過，理由係溢價過高，去到12.4%，計埋正股除息因素都有10.6%，兩個月壽命太短。要博嘅話，揀9332最實際。9332有4個月命仔，現價86仙，溢價4.7%，正股除息後計，溢價實際只係2.9%，冇貴到，而槓桿率10倍過外又夠爆炸。可留意喺挨近上月低位80仙嗰頭上車。
章盛