經常得罪大企業嘅環保界搞事分子綠色和平，家陣請緊中國分部總幹事，靚女公關Louisa話，估唔到一個咁吃力不討好嘅崗位，都吸引到過百人申請，由響噹噹嘅上市公司總裁級行政人員，到大學啱啱出嚟一啲工作經驗都冇嘅畢業生都有。
總幹事要負責策劃非常迅速而又危急嘅行動，例如上躉船封貨櫃、摩天大廈游繩半天吊拉橫額。面試時會玩角色扮演，要應徵者扮總幹事，有人扮下屬，話畀佢聽有個前綫行動「黃」咗，就嚟俾差佬拉人兼封艇，重喺佢面前喊苦喊忽，要佢即時擺平呢個混亂局面。
綠色和平總幹事一啲都唔易做，又要喺咁艱難嘅市道裏面籌募經費，又要避免利益衝突，唔准接受政府同任何企業、政黨嘅捐助。呢個職位冇乜明文嘅履歷要求，月入四萬零蚊，唔算好富貴，但係女性就享有雙倍於法例嘅分娩假期，有二十個禮拜咁多，原因係綠色和平想鼓勵婦女母乳育嬰，所以畀多啲時間佢哋餵奶。
（圖）綠色和平前總幹事何渭枝（左）已離任，由吳明正（中）署任，右邊係來自總部嘅董事局主席AnneSummers。
傳真︰2623-9278
電郵︰