創業有時可以等同創新，想有更理想的回報，必須做足市場調查，然後售賣當地缺乏而需求量又大的產品。剛於今個月才在汕頭做老闆的梁生，便睇中那兒的人口老化和潮流玩意，發展環保車和電動輪椅生意，期望可在市場上飲頭啖湯。
記者：羅蘭
攝影：Kenny
早在70年代便往中國營商的梁生，做生意的瓣數和門路可謂多不勝數，如房地產、商場策劃、機械、五金、皮鞋等，最近，還代理了一批電動輪椅、環保電動單車、環保電動踏板車等，以汕頭為起點打入內地市場。
「環保車係新興事業，尤其喺內地，人口多又老化，我嘅電動輪椅就係幫嗰啲老人家和傷殘人士；而環保電動單車就可以畀人喺屋邨或住宅區裏面行駛，用嚟代步就最適合。我上嚟創業都係因為覺得呢度有市場，而且重係好大㖭。」
梁生之所以能成為電動車的代理，皆因他有個親戚是專門生產電動車，順理成章地便得到電動輪椅和環保電動單車等代理權。
「他一向都做開電動機械生產，最近重開始生產輪椅和單車，我見到有市場，於是就跟他協議成為代理做零售，然後用我嘅營商經驗幫佢打開市場。
「其實，電動單車呢類產品早喺日本已經有得賣，市場反應都唔錯，但香港就好難推廣，因為要攞牌照。內地都要攞牌，但對呢類電動單車採取暫時寬鬆處理方法，加上呢類單車只係喺屋邨用，所以我打算先喺內地售賣，遲啲再推去香港同東南亞一帶。」
由5月上汕頭視察環境，到8月正式開業，在短短三個月內便可順利開張，梁生話全靠他有個信得過的好拍檔。「喺大陸做生意全部都要聯營合資，我就因為通過人事關係認識到𠵱家嘅內地拍檔，他在汕頭售賣和修理電單車已經有10年時間，所以我根本唔需要再搵舖位，又或者申請任何牌照。
「我只需要簽約注入資金，然後就可以運一批電動輪椅、單車過嚟，放喺『創活實業』門市部賣就得，修車師傅、銷售網、人際關係等他統統都有，所以我一路都做得好暢順，完全無任何唔順利嘅事情發生。不過我唯一最怕就係運輸方面，因為我嘅電動產品好多都係由外省運嚟，如果遇到落大雨或者水浸嘅話，就好容易有損失，好彩到目前為止都未試過。」
梁生預計他的店舖每月可賣50部電動輪椅和20部環保電動單車。「汕頭人好有錢㗎，又多退休老幹部，佢哋好多都會買我嘅電動輪椅，一部約?6,000，比起幾萬蚊一部嘅意大利貨，已經平咗好多，就算係電動環保單車，我都比香港平一半。
「我重聯絡咗呢度嘅民政局、社會福利部、傷殘會等機構，佢哋都好樂意同我哋接觸，因為事實上可以買到電動輪椅嘅地方唔多；咁通過佢哋就可以將我哋嘅產品宣傳開去，等更多有需要嘅人知道可以嚟呢度買。」
出售的電動車及輪椅等都有一年保養，如有任何損壞可拿回舖頭，由機械師傅修理。「呢度嘅師傅全部都要考一個機車維修訓練課程結業證書，先可以做維修技師，而且維修費用唔算太貴，好似換摩托車嘅電池大約需要?200。咪睇小呢間舖頭，汕頭政府都頒咗個一類摩托維修業戶畀佢哋，呢個係摩托維修行業中最高級嘅，因為要視乎你嘅技術、銷售、服務、信息發放等各方面去評審。」
梁生預計大約要兩年後才可回本。「喺汕頭做起點係因為我有好嘅人事網絡，打定基礎後，我會進軍上海、北京、廣州、深圳、香港、日本、東南亞等地，而且打算利用加盟店嘅方式擴充。即係有興趣成為加盟商嘅朋友，可以唔需要畀加盟費，只要租一間面積300平方呎以上嘅舖位，然後參照我哋裝修設計，再交足買首批貨嘅抵押費便可（即以首批貨的總額用作抵押，不再加盟時便可退回貨品），我哋重會負責埋運輸。不過，最快都要三、四個月後，等舖頭嘅生意穩定咗再講。」
查詢：61598096
開業日期：今年8月
舖租（700平方呎） ?7,000
裝修 ?30,000
人工（共10人） ?15,000
入貨 ?200,000
雜費（運輸費等） ?5,000
水電 ?300
流動資金 ?200,000
總投資額：?457,300
預計平均每月營業額：?150,000
預計平均每月純利：?30,000
1.營業執照
2.技術審查合格證
3.排放污染物許可證
4.稅務登記證
增值稅：於每月營業額中抽3%
利得稅：於每年所得利潤中抽17%
聯絡我們
面對香港經濟不景，裁員不停，失業率持續上升，香港經濟逐步轉型，人人北望。「北上創業」版訪問一些香港人在內地成功創業的例子，如閣下是其中一分子，又願意將你的經驗跟讀者分享，請聯絡我們。來信請寄將軍澳工業邨西駿盈街八號《蘋果日報》副刊「北上創業」版收或傳真：27420542。請附聯絡電話。