自由黨主席田北俊愛犬咬人？有冇搞錯？冇，八方噚日收到料，話有人報稱在田少白加道豪宅俾狗咬親，重去埋鄧肇堅醫院驗傷，單嘢話交咗畀警方同漁謢署跟進，唔知田少會唔會面臨起訴，隻愛犬唔知會否被人捉去驗，於是八方周圍搵田少問個究竟，卒之喺深夜證實確有其事，咬人者係一隻狼狗，叫做BoBo。
田少一家確實係愛狗之人，佢哋家住白加道豪宅，佔地成三萬平方呎，當然要養幾隻大狗睇住個大門口同埋間大宅。話說噚日有個工人去佢屋企，檢查嗰個電鐘定閉路電視有冇問題，田少當時喺屋企，個工人唔知點解行咗去一個地方，遇到BoBo，結果俾隻狗追佢，聽講隻腳被咬親，傷勢應該唔會太嚴重，話晒啲狗係家犬，並非野狗，希望個工人冇事啦！
原來香港法例都幾嚴，如果隻狗咬親人好麻煩，狗主要守規矩，例如大狗去公眾地方，一定要用狗帶。如果咬親人，更可能惹官非；田少咁鍾意養狗，有次有人見佢一家四口在山頂散步，一人拖一隻狗，有拉布拉多，有查理斯王小獵狗，都係小心啲好。
（圖）田北俊位於白加道的豪宅佔地約三萬呎，且有一個大泳池。 《壹週刊》圖片
傳真︰2623-9278
電郵︰