曼聯隊長堅尼本自傳真係瘋人瘋語，據英國報章《世界新聞》星期日嘅連載，堅尼除咗睇唔起英格蘭足總盃之外，亦都唔順前愛爾蘭領隊積查爾頓，話大積係個笑話。堅尼重話，不排除好似當年簡東拿咁，受唔住球迷嘅挑釁，飛踢佢哋，重會比簡東拿踢得大力啲㖭！
不過，我求大俠最關注嘅，就係替堅尼呢本自傳執筆嘅作者鄧菲突然出嚟講，話堅尼其實冇講過要蓄意踢傷前曼城球員夏蘭特，鄧菲重話係自己文人多大話，想增加本書嘅吸引性先寫落去。不過，我求大俠就質疑就算真係鄧菲加落去，咁堅尼都要自己過目本書先出得，你哋話係唔係？
南華總監Peter梁喺球隊開操前，因為同新任足主黃鎮南做嘢方式唔同，決定辭職唔玩，喺球圈引起好大回響。講開黃鎮南，呢位執業律師喺南華開操嗰日同記者講，喺Peter梁唔做消息見報後，未有機會向佢了解清楚；不過，有二五報料，話許晉奎同黃律師兩大高層喺南華開操前，確實約過Peter梁見面，至於點解見過都話未見過，就真係要問當事人至知喇。
我求大俠睇完孫繼海首次喺英超聯登場嘅表現真係唔覺得失禮，佢老鄉大連嘅親朋戚友賽前當然亦坐定定，諗住喺電視機前睇直播。不過，點知到正式開波前，大連電視台先至收到英國方面通知，轉播費要臨時「加碼」；結果電視台迫於無奈要播另一場，搞到繼海老竇孫宗亮冇得睇個仔比賽扯晒火！
唔知係咪好心有好報呢？打比郡前鋒拉雲拿利喺前日球隊作客甘士比嘅英甲聯賽中，喺比賽打到十九分鐘，比數重係○比○時，由於見到甘士比球員利雲史東頭部重創，佢立即波都唔踢，重叫球證列克腰斬比賽。雖然列克冇咁做，比賽喺延遲十一分鐘後重開，但打比郡就以二比一反勝。