上周六小初同女朋友上珠海打golf，點知都係逃唔過金魚缸老友嘅騷擾，好耐無聯絡嘅靚女經紀打電話嚟問，如果江山控股（295）批股，小初會唔會有興趣要番多少玩吓？
靚女話，佢有個行家想接嚟包銷，並問佢有冇興趣一齊玩，做下分包銷。靚女見個市咁靜，所以四圍收吓風，睇吓有興趣嘅人多唔多，先至覆人哋做唔做。
江山呢隻股，近年一直由大炒家嘅細路睇住，呢位大炒家以往曾經有間證券行，但收尾執咗，講到呢度，小初諗讀者都應該知道係邊個啩？隻股喺呢位仁兄幫忙下，做成咗唔少交易，數月前重成功引入北京控股（392）做股東。
不過，4月份公司重話手頭有現金1.3億元，按道理冇乜理由需要批股集資，加上隻股近排喺低位徘徊，成交又唔活躍，就算要配股，恐怕要先搞旺個場，先至令人感興趣。
慕容小初