嗰場仙股風暴搞到好多小股民損手爛腳，政府民望都跌到新低，阿松受命委任二人調查委員會徹查成件事，呢個萬眾期待嘅調查報告會喺下個月十號公布。但大家有冇諗過，點解好揀唔揀，要揀呢個日子公布呢？
仙股風暴發生喺七月底，阿松七月三十一號先發制人企出嚟話要調查，按以往慣例，一般調查都以一、兩個月為限期，應該喺月尾有結果，即使以個半月為限，都唔會係十號咁「零丁」。
有心水清嘅人同八方講，呢個日子內有「景轟」。其實，打開月曆就明白，下個月十一號係美國九一一事件一周年，仙股調查結果公布見報即係十一號啦，全港報紙、電視電台到時一定做「九一一」特輯，邊個有時間理接近兩個月前發生嘅仙股事件吖，咁樣就算到時調查報告話邊個官有問題，要負責，都冇人理啦。
今次仙股風波首當其衝嘅馬時亨，係阿松嘅同學兼死黨，唔通阿松真係想趁「九一一」掩人耳目，幫老友暗渡陳倉？
傳真︰2623-9278
電郵︰