1995年推出嘅A4，係近年最成功嘅奧迪車系，佢嘅出現直接令寶馬3系多咗對手；幾年嚟，呢款掛着四環嘜頭嘅巨人殺手，的確有人氣急升之感。A4嘅成功並唔係浪得虛名，佢嘅車身紮實程度、車廂各部件嘅裝嵌、以及行車時毫無雜音嘅高質素行車感受，的確有一線德國車嘅氣勢。
新款A4個樣變得唔係咁多，好處係買舊款A4就唔會有與時代脫節嘅感覺；不過就始終係舊款車，上一代A4喺2001年起嘅二手成交價已見有較多調整，一改以往抗跌力強橫嘅形勢，冇辦法，平治、寶馬在轉款後都會變得唔值租，呢個係市場定律，誰會例外？目前最早出道嘅1995年A42.6，企理狀態亦只值約7萬5千元，1997年1.8TTiptronic市價約13萬元，1.8TQuattro配6前速手波約13萬5千元，而頂級嘅2.8V6型號，1999年車則約18萬元上落，與當年48萬嘅新車價相比，三年折舊率超逾六成，屬於抵買。
另外，A4平均有頗高質素，用家多數係錫車之人，甚少粗用；但買家要注意1.8T型號改裝盤較多，無論電腦、死氣喉，以至胎軨等等都有，呢類勁改嘅二手車盤就算改裝件幾正，選購時都要衡量一下合法性及是否操作正常。
坊間重有一批為數唔多嘅1.8公升自然吸氣型號（馬力125匹），呢批車多原屬外資公司嘅行政人員用車，部份已流入二手市場，市價比1.8T平約兩成，買家慎防以為係1.8T而買錯。呢批A41.8雖然力度差些少，但普遍打理極佳，並非粗用同咪數高嘅車隊用車。