鍾鎮濤（阿B）、李彩樺、李蘢怡和Mango等前晚喺無綫電視城錄影《勁歌金曲》，即將喺紅館開個唱嘅阿B，前晚特別演唱新歌《還有你給我快樂》，而佢女友范姜素貞亦有到場，任阿B嘅私人化妝師。
記者要求阿B和范姜合照時，范姜話唔想咁刻意，於是行出行入都同阿B保持距離。結果等到佢兩個離開電視城一齊入𨋢，先有機會拍到兩個嘅合照，不過阿B同范姜都好好笑容嘅。
問阿B首新歌《還有你給我快樂》係唔係寫畀范姜？佢話：「我寫畀所有支持我嘅朋友，佢係其中一個。」日前阿B接受電台訪問，言談間似暗示前妻章小蕙教子無方，惹得章小蕙還擊，謂要社會福利署介入教仔，阿B前晚話：「根本係誤會，𠵱家個仔好乖，我唔係想撩事鬥非。」
此外，《勁歌》前晚進行交棒儀式，主持趙學而同林曉峰正式卸任，由陳松伶、應屆港姐最上鏡小姐嘉碧儀同新城DJ啤梨葉文輝接棒。
任港秀噚日去咗深水埗為已故關德興師傅嘅入室弟子湯紹聰嘅跌打館剪綵，佢話早排去咗海南島拍戲，由朝曬到晚，皮膚變咗古銅色。提到羅兆輝早前俾滙豐銀行入稟申請破產，任港秀話：「我哋都好耐冇聯絡，都唔好講佢啦。」
另外，對於寶芝林俾法庭宣布破產，關德興兒子關漢泉噚日好感慨咁話：「金錢損失近百萬，連帶爹哋嘅聲譽都受損。」
向海嵐前晚去咗尖沙嘴海運戲院出席《3X反恐暴族》首映禮。
對於今屆出爐港姐冠軍由林敏俐奪得，向海嵐話：「我對今屆港姐嘅賽果好滿意，其實賽前我已經睇好林敏俐，我心目中都投咗佢一票，佢勝出係實至名歸，佢嘅表現好大方得體。」
梅艷芳（阿梅）前晚喺新加坡舉行演唱會，佢同徒弟蘇志威合唱《緣份》一曲後，阿梅突然之間話自己到𠵱家都重未嫁，見到身邊嘅朋友個個都拖兒帶女，覺得好感慨。不過佢自憐一番之後，又話𠵱家啲女人愈老愈可愛，佢都覺得自己愈來愈靚喎！
黃耀明噚日喺九龍灣國際展貿中心為「motclub903發源地」擔任開幕禮嘉賓，佢話近排都係忙緊同張國榮（哥哥）合作嘅唱片做宣傳。佢重透露哥哥因為胃液倒流，所以成日都聲沙。黃耀明原來重計劃緊叫唱片公司，邀請周慧敏復出拍《如果你知我苦衷》嘅MV。
吳君如同杜汶澤噚日喺中環出發到銅鑼灣，宣傳「杜蕾斯Fun樂園開心快車」活動，佢哋兩個得到杜蕾斯贊助一世免費用安全套。據產品商統計，平均一人每年用六十三個安全套為正常，君如講笑話要將收到嘅安全套送畀老竇夏春秋享用，鼓勵老竇用多啲，等佢以為自己重健壯。