自從細價股股災之後，好多隻原本可以埋單成為殼股嘅股仔，因為鄺先生一句話，被新買家「踢契」而導致夭折，搞到前兩個禮拜嘅殼價由八千幾萬跌到得番唔到五千萬。不過仍然有國內資金肯繼續調錢落嚟玩，聽聞市場上已經有幾隻股仔再有買家傾緊，好似隻做批發零售嘅金科數碼（922）咁，就傳有買家同大股東傾緊偈，以上個星期隻股仔嘅反應嚟睇，就知唔講得笑，升吓升吓就由兩毫子升至上星期五嘅三毫八仙半，差唔多升足一倍。聽市場班行家講，幕後老細係有米之人，隻股如果真係可以賣得出，個價分分鐘見到六毫子。
另一隻被細價股股災迫爆倉嘅正中藥業（327），由2毫幾子跌到3仙後，傳班大戶搵到另一幫人馬幫手又想捲土重來。據行家話，雖然隻股好似喺上星期已經開咗車，但係話到明只係試探吓個市先，當銀両一到，先至係真正開車嘅時候，目標價重係一毫子樓上㖭，所以叫伏勝不妨留意吓，或者會有意外驚喜都唔定。
停咗牌個幾禮拜嘅海爾中建（1169），上周五終於復牌，原來係隻股仔行使認購權，買番國內手機生產線15.5%，間接就好似由海爾注入資產咁。隻股復牌後單日就升番五成三，伏勝覺得呢隻股好難玩，除咗因為大炒家鬍鬚麥重有份之外，最大劑就係如果海爾要進一步增加持股，就可能會再觸發全面收購點，到時海爾唔知要用幾多錢先可以擺平啲散戶。最特別嘅就係前一期高姿態幫海爾中建批股嘅卜架行，喺今次注資時竟乜都唔知，唔知係唔係佢哋唔啱嘴形而分咗手，但到底發生乜事，真係要當事人至知。
伏勝