兩位讀者來電郵，一位問點解左丁山可以上網搵到宋徽宗嘅詩。好易啫，有咗google個網之後，做搜尋非常之簡單，快過yahoo。譬如你想搜尋某一詩句，將詩句（中文）輸入之後，就立即有幾個網彈出嚟，睇真啲，台灣方面，好多大學、高校都設有中文古典書籍嘅研究網，我哋平時唔識，一用www.google.com搜尋，就全部現形。互聯網直情係世界最大嘅免費圖書館，唔利用就笨。
另一位讀者代兒子問求政府職要注意乜嘢，兼且如果要改善中文，要讀邊啲書。求職面試無非要睇幾樣：（一）儀表整潔，唔好金毛兼披頭散髮，着番套深寶藍色老西配白恤衫，結藍色呔，就四平八正，一定冇錯。（二）語文能力好，對答如流，唔好講極都詞不達意。（三）事先做吓功課，譬如見勞工處就先留意失業、黑工；見入境處就留意人口政策、雙程證、非法移民；見貿易署就留意出入口程序、貿易數字等等，如果平時對社會有認識，讀書時唔係淨係識睇蘇永康陳寶蓮新聞嘅話，就會準備好啲！
一位大學生曾經參加交換生面試，被問到以巴衝突、美國攻伊拉克等國際事務，𢱑晒頭，佢落選一啲都唔出奇。讀大學時，丟掉淺薄中文雜誌，睇多啲TimeNewsweek、《戰國策》月刊，畢業後搵工就知道着數。至於改善中文咯喎，並無捷徑，亦冇天書，多讀《古文觀止》、白先勇小說，日久見功。