廉政公署執行處「一哥」郭文緯兩個月後就會退休，離開佢服務咗近三十年嘅廉記，但係佢會即刻再投入另一項反貪工作，就係執起教鞭，義務為港大專業進修學院一個貪污研究文憑課程擔任課程主任。八方聽聞，郭sir會教番幾堂，同學生分享佢咁多年嚟調查貪污案嘅經驗，到時重可能會講到一啲佢親手處理過嘅大案，好似佳寧案等咁經典嘅案件。
呢個課程由十一月開始，要讀六個星期，學費就唔平，要成二萬五千蚊。不過，郭sir話，呢個課程重好過上廉署自己嘅培訓課程，因為除咗實務資料外，重有理論，佢重特別請嚟律政司兩位同事嚟講課，機會的確好難得。
郭sir同八方講，呢個課程係全港首個同類課程，除咗畀海外同本港執法機關嘅人員修讀之外，重好啱政府部門、上市公司同公共機構嘅人員讀，尤其係美國接連揭發企業帳目醜聞，更加凸顯咗做生意保持廉潔嘅重要性。呢排廉記同警隊搞到唔係幾愉快，唔知警隊曾「一哥」會唔會派人去上郭sir嘅課呢？
傳真︰2623-9278
電郵︰