福士車廠繼宣布推出Phaeton豪華轎車及Touareg四驅車後，日前又宣布會推出一款名為Touran嘅新款MPV，新車不但擁有全新造型設計外，多變車廂布局亦為賣點之一，快者重有望於2003年面世㖭。
Touran嘅尺碼為4390×1790×1630mm，因而能營造出闊落嘅車廂空間，而五座位屬標準設計；另一方面，中排三張座椅屬獨立設計，並可按需要而收摺或改變位置，後排兩個座位更可收摺於地台下，以增加載物容量之餘，亦表明Touran可載運七名乘客（但七座位暫為Option配搭）。前、中排座椅更備有多個安全氣袋，加埋四輪高效能碟式制動，同埋ABS等電子系統嘅輔助，行車更見安全可靠。機械方面，廠方預算會為新車配用FSI或TDI嘅電油及柴油引擎，馬力輸出由100匹至136匹不等，以迎合不同用家需要。外形方面亦見吸引，望落醒目又有型；有興趣嘅車迷，就要留意新車嘅確實推出日期喇。