蘇永康在台灣完成勒戒返港後，昨日出席慈善團體義賣月餅活動，希望藉此改善形象。論義賣反應，康仔雖不及同場的曾志偉受歡迎，不過他仍獲得不少fans支持，只是一度遭阿伯取笑他是前來賣搖頭丸。
日前在台北看守所勒戒完畢後返港的的蘇永康（康仔），昨日應福幼基金會主席曾志偉邀請，到灣仔會展義賣月餅，為福幼會籌募經費。雖然康仔因服食搖頭丸而形象受損，但未有影響fans及市民對康仔的支持和愛戴，昨日有人一見康仔即送上喉糖及飲品，亦有市民主動向他說：「蘇生，歡迎你返嚟！」但其間卻有一位老伯伯不耐煩地說：「叫佢嚟賣搖頭丸咩？」
昨日出席月餅義賣活動的，除康仔外還有曾志偉、黃伊汶（Dior）、EO2、E-kids、顧紀筠、劉曉彤、黎姿和Cookies。原本大會亦有邀請二人組合Shine，但最後因怕引起現場混亂而取消。事實上，昨日打頭陣的志偉甫抵達，已被師奶fans重重包圍，現場擠至水洩不通，保安人員即時架起鐵馬劃分採訪區，避免康仔稍後到場時會引起混亂，發生意外。
現場所見，昨日的義賣以志偉最受歡迎，逗留的兩小時內，平均每半小時約賣出七十盒月餅，康仔逗留半小時則賣出四十盒，其次黃伊汶逗留二十分鐘賣出約二十多盒，Cookies、顧紀筠、黎姿、劉曉彤、EO2和E-kids的反應僅屬一般，各賣出約十多盒。
康仔事後接受訪問時，對獲眾多fans支持表示高興和感動，對於有人窒他到場賣搖頭丸一事，康仔平靜地說：「講笑啫，冇得嬲，都唔算口臭呀，有啲重臭啦。做藝人食得鹹魚抵得渴，我做多啲公益事，都係希望做好形象，令人淡忘呢件事啫。」
他又說：「我只要做得心安理得啫，一個人知恥近乎勇，勇敢面對，唔係乜嘢大不了嘅事。」
對於服刑後在公開場合露面，康仔表示沒有太大心理壓力，事前亦不擔心如何面對群眾。康仔說：「其實我有心理準備，有啲乜嘢人講啲乜嘢說話，我唔會覺得奇怪，蘇永康唔係做啱，亦唔值得表揚，今次係反面教材，有啲媽咪拖住小朋友走埋嚟，我都會諗，唔知佢點同小朋友介紹我，由頭到尾我冇逃避，自己有責任，有做錯事，藝人應該帶正面訊息畀大家，如果有唔支持嘅口脗，我都好理解。」
康仔昨日出錢出力，自掏荷包以五百元購買了十盒月餅。而他離開會場後，則到了中環的Joyce購物，然後返家休息，途中康仔一度停車送月餅給記者，認真有心。
另一方面，演藝人協會日前代陳寶蓮母親，就《壹週刊》刊登陳寶蓮遺容一事刊登聲明，事後商台主持查小欣公然批評演藝人協會的做法。昨日志偉就此炮轟查小欣說：「演藝人協會係負責將封信交俾記協，做轉交工作，查小欣唔清楚件事就喺電台亂講，唔負責任。」
此外，環球唱片高層陳少寶和星皓老闆，均對張燊悅在未有知會他們的情況下，便私下轉經理人公司一事甚感不滿。張燊悅昨日在會展出席宣傳活動時說：「我承認係自己疏忽，所以我借今次機會同佢哋兩個講聲對唔住。」
採訪：魯萍 攝影：仇志德