PS2喺呢個暑假搞作多多，尤其係中文化遊戲推動方面更為落力，對於《GTConcept2002》同《兩人的電腦花火》呢兩隻重頭作品，SCEH重分別搞咗兩個大型活動去推廣㖭。
記者：徐影龍
當中最重點活動係SCEH同三菱合辦嘅「新地三菱盃」比賽，當日活動在大埔超級城舉行，在鬥車比賽前先鬥靚，由十位入圍賽車美少女即場表演唱歌同跳舞，當中18歲嘅Polly突圍而出奪取冠軍，引嚟唔少男士駐足觀看，加上同場有陽光大男孩組合EO2到場作表演嘉賓，令現場氣氛頗為熱鬧。至於鍊車比賽亦吸引唔少人觀看，在初賽期間已差不多有成千人參加，鬥咗成個月終於都到香港、九龍同新界區嘅車王作終極爭霸戰，車王決戰技術當然有番咁上下，最後都係由曾力戰GT之父嘅九龍車王黃國倫勝出。
另一邊喺九龍城廣場舉行嘅「夏日之花火祭」亦唔輸蝕，場中擺放多部PS2供參觀人士試玩及對戰，當然唔少得《兩人的電腦花火》比賽，最搞笑冠軍居然由只得十一歲嘅曾鎮威小朋友勝出，證明呢隻Game幾咁簡單易玩，小朋友都可以玩得好出色。現場中亦有黃伊汶同Juno助陣，少不免跟場中Fans較量一番，不過兩位嘉賓放煙花技術都不及擁護佢哋嘅Fans，總括嚟講整日氣氛亦算熱鬧。