大升1日後，港股復陷牛皮悶局，恒指全日波幅94點，收市進帳45點，報10265。港股回過氣後，相信會試衝10300至10400阻力區，能否過關，還看外圍是否配合。
利豐（494）公布業績，半年賺3.4億元，微增0.59%，但公司預料全年合計盈利會有雙位數字增長，刺激股價昨日彈升3.7%，收報8.5元。利豐有件Call輪9301，是日跳升21%，威水輪榜排名第4。
9301現價4仙，今年12月12日到期，溢價87.5%，槓桿率212.5倍，從呢組數據分析，溢價實在太高，隻輪揸唔過。9301行使價15.9元，利豐即使全年盈利增長逾1成，股價喺4個月內升8、9成嘅機會依然好微，去到尾，9301作廢嘅機會一啲都唔低。
長實（001）昨日冇升跌，但隻長實Call輪9254卻大升42%，有人用20張金牛，將佢由4.3仙買上6.1仙。9254實在升得冇理由，9月27日到期已近末日，溢價高達18.8%，槓桿率92倍冇乜意思。另一件長實輪9252，壽命比佢短3周，昨日大跌38%，溢價縮到唔夠10%，9254好快就同一下場。
章 盛