海爾中建（1169）大股東海爾集團，終於落實增持海爾中建，噚日海爾中建復牌股價勁升53%，連帶中建電訊（138）都受惠，升咗13%，收1.04元。
不過，經紀陳話唔好咁開心，噚日海爾中建咁升法，睇怕差唔多到價，況且聽唔到有大陸客抬錢落嚟炒，又見唔到有人到證券開戶炒作，橫睇掂睇，都唔似有大炒嘅迹象。
海爾中建噚日最高見過15.7仙，收15.6仙，成交股數8700萬股，金額1260萬元，雖然已較一般細價股熱鬧，但明眼人都睇到買賣盤係自己人交波仔。
今次海爾集團增持海爾中建，但持股量仍然唔足夠，能否成為集團嘅旗艦，仍有待驗證。就算真係做咗旗艦又點？海爾本身早排喺大陸都受傳聞困擾，所以蟹咗嘅朋友，睇怕都係趁股價反彈走人好過。至於中建電訊，睇怕都係跟風順手炒埋，暫時未成氣候。
慕容小初