謝霆鋒早前揸車去機場途中，喺大嶼山失控撞到律師會副會長陳傳仁乘坐嘅平治房車，因為霆鋒發生交通意外唔係第一次，所以搞到滿城風雨；不過，陳律師噚日出席英國文化協會嘅活動時，就好大方咁話：「呢件事好小事啫，只係一件唔好彩嘅事啫；我又無乜點傷，冇向佢索償。」
真係大方！唔止呀，佢重好體諒咁話：「佢咁細個，就咁成功，要受好多壓力㗎，希望外界畀啲空間佢啦！」至於謝霆鋒話要暫別樂壇，陳律師就話希望佢開心啲。
陳副會長重話，事發時同車嗰兩位律師，𠵱家康復緊，希望冇後遺症，快啲無事；佢最後再多謝外界對佢嘅關心。經一事長一智，𠵱家重有長輩咁體諒，八方希望霆鋒學識珍惜生命，唔好成日俾人話佢揸快車啦！
傳真︰2623-9278
電郵︰