為迎擊愈來愈多嘅同級對手，凌志正落力為旗下嘅RX300研製新一代車款，除外形上會作出適量修改外，更有傳新車會配用一台容積為3.5公升嘅V6引擎，以增強其競爭力之餘，重有機會改名為RX350㖭。雖然新車仍屬設計階段，其外形設計仍未有任何具體資料，但從相片中可以睇到，新車線條會較現有型號圓渾之餘，擋風玻璃面積亦會來得闊大，務求給予駕駛者有更佳之視野範圍；車尾部份則仍保持有原車神髓，並沒有太大改動。由於軸距增長，故此車廂空間會更闊大，並可容納多兩張座椅，從而令其可變成一部七人SUV；同時，新車預算會配用一台3.5公升V6引擎作為動力心臟，馬力輸出數值為約240匹，並匹配上自動波或類似Tiptronic模式嘅半自動波箱，從而令新車有更出眾嘅性能表現。新車有望於明年初舉行嘅美國底特率車展現身，有興趣嘅車迷記得留意喇。