周三晚美股大部份時間由淡友主導，但最後兩粒鐘，又見傳聞已久嘅無形之手出嚟同淡友拗手瓜，結果淡友被挾到一頸血，杜指由最多跌129點變成大升260點收市，報8743，真係唔到你唔服。
睇圖杜指前晚跌近升軌支持，即展開大反彈，若能升破平頂三角形頂部8770，50日線8900相信唔會阻得佢住，將反覆上試9500水平，美股能否破頂而上，對恒指走勢關係重大。
港股噚日跟隨美股大升258點，以裂口升破5月延伸至今的降軌阻力，7月26日低位9687及8月6日低位9632的雙底形態應可確認，至於能否升穿10400重大阻力位，就要睇杜指能否升破8770頂部，估計雙雙升破機會大。
港股好淡由四六波變成五五波，甚至六四波。其實港股已跌咗超過3個月，出現一次千零點反彈亦好正常，大戶亦樂於見港股反彈，抽高喺9月尾再質過。
趙飛雲前日提過上海實業（363）可博反彈，噚日喺12.50元買咗1萬股。
雖然技術未有明顯轉勢，只係醞釀轉好中，但9倍PE嘅上實唔係時時有，所以先上車，只要市況氣氛好啲，短中期升回15元水平應該唔太難。
趙飛雲