以前喺中區開設辦公室，最大開支是租金，但隨着經濟環境改變，現時管理費先至係最沉重嘅負擔。
利嘉閣林家安話，金鐘海富中心一座29樓D室，3015方呎，呎租十一蚊，由一間律師行承租，租期兩年，扣除兩星期免租期，實際呎租十個八，創金融風暴後中區甲級商廈新低呎租。
該單位每月租金三萬三，若同舊年比較，平咗超過五成。蘭西好奇，點解咁低價業主都願意租？行內人士話，理由好簡單，個單位已經丟空近一年，每個月依然要畀萬幾蚊管理同冷氣等雜費，少數怕長計，一年就要十幾萬！業主迫於無奈，惟有順應現時經濟環境，平啲將單位出租。不過，從租客嘅角度睇，現時就係租寫字樓嘅好時機！
恒基主席李兆基早前大讚上海樓市前景好，並會加強在當地的投資，令上海樓熱潮又再高漲，當地樓盤亦趁勢來港展銷。
由証大集團同香港上市公司上海世紀控股合作，發展嘅浦東水清木華花園，明日在港推出二十伙，面積主要係1493同1701方呎，三房兩廳設計，為增加吸引力，買家除有九七折外，發展商重送出上海三日兩夜來回機票同住宿，重有三年水清木華高爾夫球商務會籍，出手唔低。個樓盤由中原代理。
而美聯明天亦有個上海盤在港展銷，為虹橋的金斯花園，推出三十個單位，首五名買家可獲「零首期」優惠；買家亦獲贈雙人來回上海機票及酒店住宿。發售嘅三十伙，包括十座原本留作收租嘅別墅。若計入發展商提供嘅其他優惠，以面積1649方呎單位，售價八十六萬，買家初期月供都只係五千蚊。樓盤七月中曾在港展銷，至今累售四十四伙。
卓能地產委託鴻運，今日拍賣一批單位，卓能主席趙世曾拍賣前重會到場見傳媒，畀機會大家採訪，咁各記者應醒目做定功課啦！
相信趙公子今日都會睇埋個拍賣過程，第一時間知道啲貨賣成點，假如價錢夠平，唔知佢自己會唔會一時「癮」起，舉埋一份，順手執番啲用嚟收租，有興趣嘅買家就要昅到實嘞。
發展商現時賣樓，要搞好多活動去吸引市民，提供免費吃喝玩樂，睇樓人士同去嘉年華會差唔多，呢啲花招已經由噱頭變成指定動作。
由五大發展商合作嘅東涌海堤灣畔，上個禮拜已經搞咗嘉年華會，今個禮拜繼續，同時加碼送「置業攻略」一書，介紹海堤灣畔特點，同埋區內設施嘅詳細資料，可以用嚟做買樓嘅參考。另外，發展商重有紀念品送，等佢哋日對夜對，置業嘅時候都會諗起海堤呢個盤，咁就得米嘞。
發展商愈嚟愈多嘢送，都係希望帶旺個盤，但有時都未必有着數，好似早排市區有個樓盤，提供免費飲食，重有駐台歌手獻唱，但只吸引大批公公婆婆捧場而已，不過阿Q啲諗，當係敬老囉！
利嘉閣噚日舉行銀主貨拍賣會，其中灣仔皇后大道東145號恒山中心一及二樓，6120方呎商舖，就以一千二百二十萬交吉售出，聽落好似冇乜特別，但據可靠消息人士透露，買家為名人趙曾學韞。
趙太呢排都好唔得閒，因為佢同老公趙善簪持有嘅山頂歌賦山道十九號獨立屋，上月中開始委託代理放售，間屋佔地萬三呎，上蓋建有一間約六千呎洋房，估計市值約億四元。
趙太一邊出貨一邊入貨，但買嘅就唔夠放售嘅貴重。
蘭西
電郵地址：