嚟緊9月下旬，香港又一次舉辦國際性嘅經濟會議，聽聞有唔少國家及地區經濟首腦，又或者大機構嘅總裁出席。過往，亞Mark都好少留意呢類新聞，惟自97年回歸之後，先後有平治、積架及凌志等代理商，響會期中提供轎車作交通工具後，均會以超筍價將批車出售，因而吸引到唔少車迷注視；而今趟寶馬代理，更會提供70部全新735iCEO特別版給與會人士代步，三日會期每車平均里數，相信都不過一、二百公里內，跟完好嘅全新車可謂別無兩樣，但聽聞代理經已放風，話會將批車價由原來89萬，大減20萬至68萬8千咋！兼且買家重可以零手，於10月初提車㖭！亞Mark收風話經已有近40部車給認購，若然有興趣想買部「財爺」坐過嘅735iCEO特別版的話，就真係要行快步喇！