名模Rosemary前晚在人流複雜的佐敦區的士高表演吧枱泳衣show，有現場男士批評她肥胖及腿粗，但Rosemary卻表示不介意。她更稱做模特兒應多作嘗試，不應局限自己，亦未覺在的士高表演會降低身份。
名模Rosemary前晚與男友Gordan欣賞過美國搖滾勁旅GunsN'Roses的演唱會後，隨即往佐敦大華酒店內的348的士高演出泳衣show。Rosemary穿上一件頭泳衣在吧枱行catwalk，令現場男觀眾熱血沸騰，但亦有不少男觀眾批評Rosemary肥胖及腿粗。
演出過後，問Rosemary在佐敦這類人流較複雜的場地行catwalk，且更常有警察查牌的情形出現，會否不習慣？她說：「都唔會，呢度啲保安都OK呀，而且我行嗰區係的士高嘅VIP區。反而因為第一次喺吧枱行show，驚影響水準，覺得有啲緊張就真。」
Rosemary肯接這類型工作，酬勞一定十分可觀？她說：「價錢幾多係秘密，而且我媽咪同呢間的士高嘅老闆係好朋友。」問她會否下不為例，不再接這類show？她說：「唔知呀。」
至於現場有男性觀眾批評她肥胖及腿粗，Rosemary則說：「每個人都有唔同嘅意見，我唔介意人哋講乜。」
再問她環顧本地知名模特兒中，只有她會接這類型工作，會否覺得有降低身份之嫌？她說：「我唔覺得做呢啲show有乜問題，而且做模特兒唔應該局限自己。」