雲咸南華大廈係一座食店大廈，地牢係中環最出名、歷史悠久嘅Jimmy'sKitchen，三樓係上海總會，四樓係五陵會，五樓係華商銀行公會，每日中午，呢度就滿係食客，左丁山經常在此出沒。呢日經紀K約去四樓五陵會食晏。呢個會過往供應豉油西餐、碟頭飯，生意清淡，幾個月前重新裝修，環境幾好喎，有一個大露台，秋季黃昏，天高氣爽之日，在此飲番杯，相信會好過癮，成個中環都好難搵到同樣地方㗎。
現在五陵會全日供應粵菜，居然經營到晚上十一時，認真搏。會員話，廚房主廚係喺威靈頓街口嗰間賽馬車會挖角過嚟嘅，應有水準。呢日中午，經紀K同我哋四位食飯，菜式鮮明，又幾好喎，五個人食飯連甜品，六百蚊有找，唔使畀貼士，叫做物有所值，但有一樣戥個會唔值嘅，就係人客稀少，中午時份，中菜廳數埋唔夠二十幾人，認真清淡，反為五樓嗰間華商銀行公會就經常爆棚。
經紀K話：「五樓嘅會員多啲，五陵會會員比較少，老人家多，未必每日都嚟，所以蝕底啲。五樓好多銀行界中層人員食飯，生意係比較好嘅！」好彩五陵會會所係自置物業，唔使交租，否則真係皮費難頂。試過菜之後，大家都話以後可以上嚟食飯，起碼實有位，唔使預訂！