《南華早報》架構檢討終於有結果，編輯部四人管理小組有三個升職，C.K.Lau、SusanSams同RayBashford全部升做執行編輯，連埋AnthonyLawrance成為編輯部「四人幫」，實行集體負責制，為《南早》定編輯方針。至於邊個負刑責，即係有事要坐監嗰位，《南早》起初話未必有新老總，後來又話舊老總Abraham月底先至正式離任，到時可能由「四人幫」升一個上去。
之前有傳《南早》想解散政治組，原來的確有變動；做咗十八年嘅政治編輯ChrisYeung升為Editor-at-large，話會有更大權力喎。佢老哥屬下嘅政治組就歸咗總採訪主任旗下。不過噚日總採訪主任SimonParry又遞信辭職，班記者唔知向邊個滙報好。《南早》發言人強調此舉唔等於冇咗政治組，只不過希望阿Chris可以更加自由自在做政經大新聞，唔使再管人，八方聽落又真係幾正。
另外，《遠東經濟評論》話《南早》近年同其他報刊一樣，受金融風暴衝擊，廣告收益大減，更大鑊就係其他中文報紙異常進取，好似《蘋果》就成為最多商界高級行政人員睇嘅報紙，超越《南早》，令到《南早》被迫重組。至於編輯方向會轉成點？遠評就引述《南早》新出版人Beczak同員工開會時所講：「我唔關心華盛頓嗰班中國觀察家點諗，買我哋份報紙嘅又唔係佢哋。」
傳真︰2623-9278
電郵︰