九人女子組合Cookies最近被周刊指其中六位成員Miki、Elaine、Teresa、Stephy、Gloria及Angela，被公司安排入住旺角舊樓，每天更要睡碌架床。Cookies的成員Elaine更笑言沒有床瞓要瞓地下。
九人女子組合Cookies昨日被周刊指其中六位成員Miki、Elaine、Teresa、Stephy、Gloria及Angela，被公司安排入住樓齡達三十年的旺角舊樓利寶大廈，又指六人要睡碌架床。Cookies昨日在尖沙嘴幫港台向市民派發宣傳單張，成員之一Elaine更笑言：「係呀，我哋連床都冇得瞓，瞓地下咋。」
Cookies對於被指六成員要瞓碌架床，Elaine昨日氣憤地說：「係呀，我哋連床都冇得瞓，瞓地下咋，夏天涼爽啲嘛。」她續說：「講笑啫，我哋係住喺嗰度，每個人都有張單人床，唔係碌架床，其實間屋可以叫做公司宿舍，我哋六個住得比較遠，方便工作啫。嗰度係女生宿舍，唔歡迎男性。」
問Elaine公司宿舍設備是否足夠？Elaine說：「入面有雪櫃、有電視，基本用品都有齊，間屋有千幾呎，有兩間房，其中有間房好大，可以放三張床，我嫌間屋太大，可能陳設簡單，望落去好大咁。」
有指Cookies出席有記者在場的公開場合才會租用專用二十四座小巴，平時只會坐的士，Elaine反駁說：「係我哋唔想咁煩，要部車車完我哋，又再車其餘三個啫。」
另一方面，有傳麥浚龍追Cookies，昨日Gloria反應很大地說：「吓，唔係啩？唔覺得喎，可能樹大招風啫。」
採訪：汪正文攝影：何國豪