以為港股會先試9700水平，點知隔晚美股又係臨尾發威，杜指大升260點，帶動恒指昨日裂口高開，大升258點，收10219，而且有成交配合。
經過昨日一升，恒指終於衝破5月延伸下來嘅降軌阻力，技術上意義重大，可能係大市轉勢嘅先兆，若能進一步突破雙底頸線10329，即可確認轉勢。
勇進者自然係追揸Call輪，想安全啲，則可待恒指衝破10400至買貨。
兩件末日恒指Call輪9174同9201，是日分別飛升74%同45%，但唔啱一般人玩。睇好後市想揸恒指輪，應該揀9406，現價19.6仙，重有近半年壽命，溢價9%合理，槓桿率17.4倍，爆炸力亦算唔錯。
油價上升，加上公司有消息，中海油（883）昨日曾高見11.30元，為上市以來新高，收市時回順，報11.15元，仍升近3%。中海油5件Call輪都有進帳，其中9175升12%，現價2.85元，11月4日至屆滿，但已有負溢價0.34%，槓桿率3.9倍，數據幾吸引，可惜買賣好難，而且怕正股可能要回氣。
章 盛