老老實實，就算大凌集團（211）股價繼續升，小初點都唔信有大陸客咁斗膽去敵意收購佢。
自從呢個收購謠言出現後，大凌股價就開始郁動，噚日又升16.67%，收10.5仙。個棚雖然搭得靚，但成交就好細，唔夠二百萬銀。
大凌老闆在金融界中，係一名財技高手，無端白事又點會整件大陸客出嚟搞事。如果話係有人想造謠趁機炒一轉，小初都會相信。
早前大凌話供股跟住又唔供，當時有份做包銷嘅經紀，就傳出因為有兩個大陸客揸咗兩成大凌股票，但佢地反對供股，所以先至唔成事。
不過，大凌呢隻股票，自從併完股之後又供股，街貨恐怕都收得七七八八，再加埋上次宣布供股後，股價急挫，相信所有倉底貨都被震晒出。試問有乜理由，一個冇關連人士可以在短時間內收齊咁多貨，你估真係好似食生菜咁簡單？
慕容小初