美國企業高層紛紛宣誓保證公司帳目真實無誤，咁樣都可以刺激前晚美股大幅反彈，真係講都冇人信。若日後美股下調，相信理由可能係市場發現原來發誓可以當食生菜。其實布殊呢一招真係比較幼稚，但難得股市都跟埋佢一齊幼稚。香港監管機構鍾意借鑑美國嗰套，唔知日後會唔會為咗挽救香港股市，叫所有藍籌股高層一齊宣誓呢？
中移動（941）聲言回購後，股價果然彈升，噚日收22.75元，升3.88%，成交達8.03億元。除咗因為有退休基金吸納外，亦有唔少衍生工具交易商及淡友要入市對沖及平倉。滙豐（005）在炒除息效應下亦升2.27%，收89.75元，成交高達12.9億元。
天網國際（577）原本諗住借長江生命科技（8222）上市之勢，購入國內藥業後扮生化藥業股，跟住借勢炒上抽水，可惜生化及藥物股熱潮眨眼間就玩完，家陣股價炒唔起，而財務狀況亦唔理想，惟有洽售本業雲石業務以解財困。黑客話，要出售雲石業務唔容易，否則一早就已經賣咗。
大凌（211）早前宣布停止供股，股價隨即反彈，跟住又傳出有國內投資者擬敵意收購，據聞一連串行動與管理層想挾淡倉有關。有消息話，由於有人睇死大凌重組股本及供股後一定大跌，所以有人偷雞沽空想從中獲利，而且重在場外沽出供股權。今次終止供股，搞到淡友唔知點收科？至於大凌被人狙擊一事是否屬實，相信只有大股東至知。此股噚日升16.67%，收0.105元。
阿 虎