郭富城（城城）相隔咗六年，前晚喺大阪厚生年金會館，展開佢一連三場嘅第二次日本巡迴演唱會，城城全晚唱咗二十五首歌，而且重用日文同fans傾偈，𠱁到在場二千四百個fans眉飛色舞。城城一開始就用日文話：「多謝全日本fans支持，我會努力又唱又跳，希望你哋睇得開心。」
將頭髮中間部分染成金色嘅城城，前晚形象可算多變，佢唱《驚變》同《遊園驚夢》嘅時候，就戴假髮同着披肩，扮成步驚雲一樣，搞到啲fans不停尖叫。而佢唱《無忌》時，就以武士look出現，同扮忍者嘅舞蹈員大打一場。
而城城緋聞女友藤原紀香前晚亦有捧場，紀香重穿着和服，全身傳統打扮，坐喺前排欣賞城城演出，不過佢睇完表演就立即由特別通道離開。城城今晚同聽晚重會分別喺東京同橫濱繼續佢嘅巡迴演唱會。
特約記者森林檎大阪直擊
黃伊汶噚日接受港台《娛樂滿天星》嘅訪問，對於再次同張燊悅傳出不和，佢就即刻否認。講到唱片公司對張燊悅不滿，佢就解釋：「呢啲嘢唔到我干涉，以我所知，唱片公司同經理人公司都好錫佢。張燊悅係一個好有主見同主動嘅女仔，做藝人梗係有要求嘅，最緊要係大家舒服。其實今次只係佢約滿唔再續約，其實好小事。」
陳伶俐噚日出現喺電視城，同成班《皆大歡喜》演員食飯，記者上前問佢係唔係想演出《皆大歡喜》，佢就好開心咁話：「係呀！我已經入咗《皆大歡喜》，上個禮拜接電話，今個禮拜一就開工，我個仔都好支持我，重成日打電話問我幾時喺『雞蛋歡喜』出現。」
鄧健泓噚日接受港台節目訪問，重自爆話自己前幾日食錯嘢肚屙咗成二十幾次，佢講笑話：「減肥唔使食藥，去搵間污糟啲嘅舖頭，我𠵱家重可以去拍纖體廣告。」講到女友原子鏸家姐喺電影《三更》有全裸演出，佢話有機會都會睇，不過自己就接受唔到原子鏸全裸演出。
有線電視節目部執行董事馮美基榮休，有線噚日喺荃灣專誠為佢舉行一個記者會。有線主席吳天海頒咗隻刻有「勞苦功高」嘅銀碟畀佢，感謝佢多年嚟嘅努力。馮美基話舊年再婚後，一直希望可以有多啲時間陪老公，所以有呢個決定，佢重話對接佢手嘅徐小明非常有信心。
朱慧珊噚日喺銅鑼灣為亞視節目《慧珊時尚坊》拍外景，今次佢哋介紹Maserati嘅名車，架架都過百萬，就連揸開平治跑車嘅朱慧珊見到都心動，佢話：「Benz一向係我嘅dreamcar，雖然自己都擁有，但𠵱家見到咁多靚車都心動，我嘅專一都受到考驗，揸架靚車俾人撩都抵。」