碧咸最近就話腳趾傷𠵱家重係痛緊，要過多幾個月先至可以完全康復咁話。之不過，我求大俠覺得佢有啲用傷勢作為藉口，唔願催谷狀態之嫌。
冇錯，碧咸忍痛幫英格蘭踢世界盃，的確完全為咗國家隊着想。不過，世界盃都完咗成個月有多，連熱身賽都踢埋，佢重話要成幾個月時間，腳傷先至會冇事。
如果真係受傷唔踢得，要唞成幾個月都無話可說，之但係碧咸嘅情況重可以踢，同時又話自己幾個月後先回復最佳狀態，咁即係點？
以𠵱家曼聯陷於歐冠盃出局危機，睇嚟同Vodafone簽咗一百萬鎊合約、聽日聯賽開鑼戰又有adidas新紅色波砵着嘅碧咸，係時候認真準備新球季，唔好令fans失望啦。
自從中村俊輔加盟意甲里賈納後，據報話好多日本記者寧願走去採訪佢，多過採訪中田英壽。鬼咩，中田份人不嬲都串串哋，有時重向日本記者賣弄吓自己嘅意大利文，乞人憎。佢再唔改性格，風頭遲早比師弟蓋過。
噚日我求大俠至講過費倫天拿重組工作唔順利，估唔到即刻聽番個好消息──老將迪里維奧決定追隨球隊，重肯收丙組人工㖭。以迪里維奧經驗同實力，其實唔難喺甲組落班，佢咁忠心真係抵讚。
羅馬早幾日拉隊去埃及踢友賽（班球員拎晒相機周圍影相，似遊埠多啲），結果喺炎熱天氣下踢到企晒喺度，輸咗畀阿赫利一比二，都幾樣衰。不過教練卡比路睇中對方後衞沙迪，據講條友成場波搞到巴迪斯圖達無啖好食喎。睇吓羅馬會唔會因輸波而得福嘞。