台灣人氣偶像周杰倫，前晚喺九龍塘大學會堂出席新城娛樂台「聯Fan所定周杰倫歌唱大比拼」。周杰倫喺台上除咗唱歌，重打籃球同玩雙截棍。而大會前晚亦安排咗八位參賽者進行歌唱比賽，大部份參賽者都係模仿周杰倫，結果由一位女參賽者陳靜媚以演唱《威廉古堡》勝出。
周杰倫前晚見到眾參賽者喺台上落力表演，大讚佢哋好大膽。佢用國語話：「記得我以前參加比賽，我因為緊張的關係，自己唱得亂七八糟，而且還走音。其實當時我本是想參加創作人比賽，可是朋友卻為我報名歌唱比賽，因此比賽時有點怕。」
此外，周杰倫表示呢次嚟香港舉行音樂會，順道去銅鑼灣逛街，佢話：「逛街是我的興趣，但我這次並沒有特別買到甚麼。」周杰倫前晚表演完畢，即坐夜機離港。
湯盈盈噚日喺電視城宣傳明珠台猛片《埃及王子》，佢話近排難得放假，準備將屋企重新整理，皆因已有大半年冇執過屋。
湯盈盈重話稍後會到多倫多登台演出，𠵱家正積極備戰。對於郭羨妮走光一事，佢講笑話：「咁咪要着靚啲嘅底褲，不過希望佢唔好唔開心。」
今年恒香又搵薛家燕做生招牌促銷月餅，重依照家燕姐一家四口嘅卡通肖像做咗一批月餅。家燕姐噚日喺上環拍月餅廣告硬照時話：「呢啲月餅同普通月餅唔同，入面啲料係士多啤梨做，好健康。以前恒香會做啲米奇老鼠，同埋其他公仔月餅畀小朋友，但係今年就搵我做埋。」
新人趙頌茹（阿Yu）噚日喺葵芳接受新城《一個靚墟》訪問時，話自己好怕醜，所以對心儀嘅男仔會採取唔睬佢嘅態度。阿Yu話佢鍾意有才華、靚仔同高大嘅男仔，圈中劉德華就最符合條件。而一啲年紀大過佢好多，或者細過佢嘅人，阿Yu都唔介意同佢哋拍拖，但同性戀佢就話當然唔會啦。
江芷妮噚日喺電視城出席宣傳活動，佢話嚟緊會唔再主持節目《K-100》，但其他工作就接踵而來，而且重受到經理人公司星皓力捧。江芷妮話：「我將會拍電視電影，嚟緊又接咗一啲時裝硬照廣告同一個床褥廣告，工作已經安排得密麻麻，所以都要好好保重身體。」
黃夏蕙前晚喺新光戲院為《紅伶閨秀獻真情》演出，雖然宣傳單張話祥嫂有份表演，但就唔見佢出現，不過蝦叔關海山兩公婆就去咗捧場。蝦叔𠵱家仍然要坐輪椅，但精神唔錯，而佢話已經好番好多。蝦嬸就話唔記得帶枴杖，所以蝦叔要坐輪椅。