小初前日講過恒豐金業（870）傳配股，噚日隻股即遇強大沽壓，究竟係炒家冇水，抑或如小初所言，貨源太散難炒上呢？
講到配股，唔知點解喺今時今日市況唔多好嘅情況下，仍然接二連三有細價股傳出想搞批股，唔通真係靜極思動？
經紀陳話，股權易手後嘅金科數碼（922）同中國特種纖維（285）等，都喺傳聞有意配股嘅名單內，其中金科上周勁升後停牌，原來大股東違規，唔覺意在公布業績前買咗多少貨。隻股可能會被聯交所抽秤，但噚日復牌後繼續炒上。經紀陳話，新主買隻殼返嚟，想做嘢都要搵水先，所以炒上好正常。
另外，小初月前提過中國特種纖維股價走勢好硬，近日再睇真啲，原來已屢創新高。經紀陳話，江湖傳聞有證券行想幫佢批股集資，但隻股現價PE成20倍，認真唔平，究竟有乜人肯要貨呢？
慕容小初