蘇永康表示在土城勒戒期間，他生活得十分平靜，每天看書、看電視打發時間。他又勸安雅不必擔心，笑言聽聞女子看守所的生活比他所經歷的，還要舒服輕鬆。
記： 你喺勒戒所嘅日子係點樣過？
康： 我啱啱入去第一、二日係星期六同星期日，係最寧靜嘅，裏面冇搞任何活動，只係食飯瞓覺，到星期一就見吓心理醫生、驗尿驗血，到四點播佛經，之後見律師。我唔使洗廁所，不過就要抹地板，一日抹三次，因為間房裏面，食飯又嗰度，坐又嗰度，瞓覺又嗰度，你唔抹都得，但我就每日食完三餐都要抹一次，我室友就負責洗碗。裏面環境冇想像中咁得人驚，只要室溫高過二十七度，把風扇就會自己開。我每日趁人哋放風，有半個鐘時間係完全得我一個喺房度，我趁呢段時間去廁所做大事。
食完午飯就睇吓書，三、四點就播吓佛經，然後見律師，食埋晚飯就睇七點新聞，睇埋張衞健套《齊天大聖》再睇吓書，十一點左右就瞓囉！每日就咁過，環境好寧靜，心情好平靜，覺得悶時就再睇書、睇電視分散注意力囉，好彩有張衞健。
至於件制服都着過冇幾次，基本上我喺房度只係着底衫短褲，係出去驗尿見律師時先要着番。開頭同我住一間房嘅人三日就走咗，後來入嚟嗰個係二十一歲應屆大學生，佢好擔心會俾學校知道，我哋大家都有傾
記： 你會點樣教安雅去面對勒戒生活？
康： 如果台灣司法程序對我係公平嘅，亦應該對安雅公平，我嘅指標係十一日嘅話，留多我一日都唔啱。叫佢唔使擔心啦，聞說女仔嗰邊重舒服啲，因為人少，入到去個人自然就會好平靜，有癮就戒，唔使亂諗嘢，入面嘅人唔難相處，唔鍾意洗衫就帶多十幾套內衣去替換囉，嗰度地方好乾淨嘅。