嶺南大學校長陳坤耀真係有本事，成日請到阿董伉儷一齊食飯。上次席設元朗大榮華食新界菜，當時傳出陳坤耀可能做教育部長，雖然最後唔成事，陳校長仍然請到阿董去飯局。
今期《東周刊》報道，呢個富貴飯局席設銅鑼灣駱克道嘅富豪酒家，該店出名食阿翁鮑魚同黃油蟹。當晚出席者除咗阿董，尚有九倉主席吳光正夫婦、新鴻基地產副主席郭炳聯夫婦、四洲集團主席戴德豐夫婦、終審法院首席法官李國能伉儷。呢個組合究竟傾乜嘢，認真考起八方。
八方於是向富豪酒家老細翁仰光打聽，佢話成日都有政經界名人上去食飯，不過要守秘密，唔講得畀八方知個飯局食咗啲乜。八方睇過佢其中一款菜單，每位一千零八十元，都好豪。
佢又話阿翁鮑魚咁出名，好多人都會嚟試吓，重猛同八方講整鮑魚心得，話第一要揀最上乘鮑魚，日本嘅溏心鮑魚最正；第二要講廚藝，佢用最傳統方法砂鍋炭爐，有專人用心去煲，煲到隻隻都原汁原味，從來冇落蠔油或者味精。唔怪得陳校長等人咁捧場，猛說好食。
傳真︰2623-9278
電郵︰