位於馬灣珀麗灣對岸的深井碧堤半島，發展商九龍倉已密鑼緊鼓準備開賣，唔少地產代理亦做好部署，諗住搞完珀麗灣，轉地盤做下個熱賣盤。
九龍倉將碧堤半島基座商場名命為碧堤坊，地下及一樓三萬呎會做商舖。中原地產就未雨綢繆，承租該商場地下逾千呎舖位專做碧堤半島生意。原來九龍倉喺上月中，公開邀請各代理行競投該「一千零一個」嘅舖位，租期約半年。
聽講今次畀中原奪得，係「銀彈」攻勢成功，租金支出達七位數字。唔單止出手闊綽，重好有誠意咁提交埋市場報告，分析市場形勢同銷售部署等資料。為配合碧堤半島以意大利風情做賣點，個舖都會有意大利feel。今日做代理，要突圍自然要奇招百出，贏到對手之餘，最緊要贏到發展商歡心，咁至有生意。
馬灣珀麗灣完成內購之後，市場原以為「西線無戰事」，不料各大發展商及代理都抱同一心態，諗住趁空檔搞宣傳，結果又出現撞期撞到七彩嘅場面。
長實長沙灣泓景臺二期周一晚突然內購後，今日將焦點重投尖沙嘴港景峯，設「書中自有黃金屋」獎勵計劃，明顯針對近期家長為子女搵學校嘅黃金檔期。
而太古地產今日開放西灣河逸濤灣全新現樓示範單位，另闢戰線。
至於新地珀麗灣內購後，代理執行董事雷霆今日又出席中記飯局，繼續為開售做工夫。
九龍倉就為將推出的深井碧堤半島造勢，助理董事黃光耀會出席物業嘅代理舖位簽約儀式，為樓盤熱身。
經濟持續不振，不少行業都收縮業務，但亦有公司逆市擴充，其中較少人為意嘅書店原來係淡市下嘅贏家，皆因好多市民都要買書睇嚟充實自己，自我增值。
大型連鎖書店三聯書店，剛以月租十六萬承租荃灣大河道十至二十號二樓全層，成立荃灣第二間分店。
美聯物業新界舖位部經理倪金河指出，該店全層約六千方呎，租期兩年，前租客係越南菜館，月租約十八萬。現時三聯在荃灣富華中心三樓嘅分店，面積萬六呎。
發展商賣樓，有時會內購一輪，先至公開發售剩番嘅單位，傳媒好多時都統稱為「貨尾」。但不論點樣，發展商都唔鍾意「貨尾」呢個叫法，覺得係有「冇人要」嘅意思。
莊士國際向蘭西強調，話佢哋北角莊士維港軒，一直都係做緊內購，上個禮拜以一口價方式發售6伙，都係未賣過嘅新單位，所以對本報標題稱之「貨尾」，覺得唔係好妥，咁蘭西惟有講聲sorry。
不過，發展商好多時賣樓都唔會講明推啲乜單位，又冇價單畀傳媒，咁又點可以分清邊啲先唔係「貨尾」呢？認真考起，希望有高人可指點一下。
望子成龍係普遍父母嘅心願，為求能讓子女入讀好學校，不惜要學「孟母三遷」。香港置業駿景園分行經理余倫鋒透露，該行剛代客租成火炭駿景園十座高層A室，面積1206方呎，全包月租萬六，呎租13.3蚊，屬市價。
呢個租客原本租住九龍塘廣播道，因為個仔考到沙田名校培基小學，要就佢返學，所以搬入沙田，睇咗一個月樓先至落實租駿景園。今次搬屋，居住面積重大咗啲。
九龍塘係出名嘅名校網，個租客竟然跨區轉入沙田，原因亦為咗間學校。
其實有名校網嘅地區租售價一向都硬啲，因為業主都睇到呢個優勢，每年開學前呢啲地區嘅成交就特別多。
蘭西
電郵地址：