買手R本來約埋一班老友去飲番杯，點知老闆自新加坡打電話嚟，要佢次日晚立即搭UA去新加坡，買手R要做準備工夫，於是取消約會。兩日後，買手R返到嚟，滿面倦容，餐廳羅問佢過去新加坡係唔係同老闆狂歡，玩到腳軟？買手R苦笑話：「做到腳軟就真。老闆喺新加坡出差，無意中聽到新加坡有唔少生意破產關門，新加坡政府將啲破產公司嘅生財工具分門別類，集中一齊拍賣，資料全部上網。老闆一睇之下，發覺有十幾種啱用，於是急call我去入貨。拍賣場外有幾百人排隊，人人諗住執平貨，我哋嘅心頭好竟然俾人買晒，我想買嗰啲，件件都有當地人同我搶，叫高晒。於是我唔買，但散場後，就有人行埋嚟同我講數，問我出乜嘢價錢，我話四千美元。佢哋話最少要三萬美元。其實嗰啲物件都幾專門，只啱我哋公司用嘅啫，未必會有其他人有興趣，於是博一鋪，企硬。結果嗰晚好夜佢哋打電話嚟酒店再叫我買，五千蚊成交。其實原裝新貨要成十幾萬美金一件㗎！其實運費重貴過貨價，不過計落都慳番唔少。」
港星兩地破產案多，皆因經濟不景。香港人又幾醒目喎，識得去嗰邊趁機會執番一啲啱用嘅平貨，買手R話上網有益，經此一役，佢都好留意網上嘅破產貨消息，以免走雞。