Smart向來以雙門及嬌少玲瓏嘅形象，備受一眾年輕車迷追捧，而最近外國方面就傳來消息，話Smart將於2004年推出五門版，以迎合不同用家嘅需要。先從外形方面說起，身形望落與福特Fiesta相近嘅五門版Smart，車首造型與原有型號同樣來得夠Cute，但改用五門設計方便乘客上落之餘，提存尾廂嘅行李亦較前方便。車廂布局簡潔清晰，空間亦來得寬敞舒適；但由於新車仍屬設計階段，故有待廠方公布有關資料後方可作實。另外，該消息指新車會配用分別係1.1公升（75匹）及1.4公升（90匹）嘅引擎，以求令其有較佳嘅性能表現。新車有望於2004年推出，有興趣嘅車迷屆時就要留意喇。