美國唔減息，但聯儲局又同時暗示經濟有轉壞可能，咁即係咩意思呢？據炒開美股嘅ICQ英哥話，咁即係意味聯儲局已經覺得減息對於刺激經濟作用唔大，但又不能不承認經濟有下滑危機，所以今次給予市場嘅信息相當利淡，雖然小布殊話過可能將短期稅務寬免措施變成長期政策，不過咁樣只會加重政府財政壓力。講開又講，美國好大機會攻打伊拉克，小布殊可以一石多鳥，既可推翻侯賽因政權，又可令班軍火商及石油商老友賺大錢，打仗將刺激油價上升，所以香港投資者不妨留意中石油（857）及中石化（386）。
中移動（941）唔派中期息早已係預期中，但估唔到中移動會出口術，聲稱會以回購支持股價。中移動股價原本一度下挫逾3%，最終收窄至1.57%，收報21.90元，成交增至6.24億元。據聞午市有退休基金入市趁低吸納，因為預期此股年底會派息，日後可當係公用股咁持有。
正中藥業（327）主要股東被財務機構斬倉後，股價一度跌至3.2仙，噚日反彈至4.9仙收市，不過仍與斬倉前0.226元水平有好大距離，但有人不斷話幕後已經搵到大水喉頂價，唔知真定假。
華脈無線（499）噚日好似有少少熱身迹象，股價升2.17%，收報9.4仙。黑客話，據聞幕後人士有意在短期將股價推高至重上0.10元，然後再向0.13元進發，終站在0.20元。此股在細價股股災前已開始腳軟，由0.10元樓上回落至8.3仙水平，早已反映幕後有啲力不從心，不過經過細價股股災後，股價跌至6.3仙後穩步回升至9仙樓上，似乎仍有人在維持秩序。
阿 虎