蘇永康在台灣勒戒十日後，他表示與勒戒所的殺人犯聊天讓他學懂珍惜，他寄語將入勒戒所的安雅，不用太擔心及胡思亂想。康仔又自言已習慣了勒戒所的規律生活，回港後仍過着「土城時間」。
蘇永康在台灣接受觀察勒戒十日後獲釋，太太特地辦理緊急簽證到台北接他回家，其母亦在香港準備燕窩雞粥為他補身，一切似已雨過天青。但習慣了看守所的規律生活後，康仔昨日接受本報訪問時，坦言現在尚停留在「土城時間」，時差還沒有調適過來。
康：蘇永康 記：記者
記： 首晚返家嘅情況如何？
康： 我噚晚（即前晚）返到屋企，首先係大廈管理員夾道歡迎啦！佢哋見到我就話：「阿蘇生返嚟喇，冇事喇。」入到屋工人就話我瘦咗，到我阿媽出嚟，佢見到我只係話：「出嚟啦！得啦，冇嘢㗎嘞。」之後就叫我用碌柚葉沖涼，又整咗一大煲燕窩煲雞粥，我好飽都食埋呀。
公司重準備咗一份呢兩個月嘅剪報畀我睇，有成三吋咁厚，我諗我入咗演藝界十八年嚟，之前所有新聞都唔夠呢兩個月咁多。我𠵱家重過緊土城時間，夜晚十一點幾開始就想瞓，今朝早七點醒咗，之後重習慣性去廁所先。
記： 見番太太同母親，有乜想同佢哋講？
康： 我都未真正坐低同老婆講過啲乜，佢上星期五喺新加坡攞緊急簽證過台灣睇我，我都唔知佢嚟咗，嚇我一跳，我上到車都未諗到同佢講乜，就俾成百個記者圍住，喺車度我打電話畀阿媽同外父外母報平安，返到酒店就剪髮同公司開會，第二日工作就一路咁嚟。其實我同佢哋講對唔住，都講咗上千萬次，我都有同阿媽講番裏面情況。
記： 今次件事有冇令你有所領悟？
康： 我失去咗十日自由，換上天畀我一
康： 唔服氣嘅感覺過咗，畀我快啲入咗去出返嚟，好過件事糾纏不清。不過我阿媽好犀利，佢冇喊過，都好頂得吓，我老婆就冇喺我面前喊，但我估佢有喊過。其實我最唔舒服係啲人誤會我係監躉，我都唔係，我冇犯罪紀錄，可以申請良民證。
記： 你覺得喺呢一件事入面，壓力最大係幾時？
康： 知道要去觀察勒戒嘅時候，死啦！乜嚟㗎？我好驚。我去見過心理醫生，醫生話我有憂鬱情況，出好多手汗、手顫同食極都唔肥，於是開咗啲抗抑鬱藥同安眠藥。如果唔去勒戒要俾人通緝十二年，犯不着。其實過得兩日都習慣，之前係自己嚇自己，嚇得太緊要。
記： 有報道指你今次件事會被香港戒毒所同埋學校列為教材，你有乜感覺？
康： 我𠵱家只知我已正式接受呂秀蓮邀請做台灣反毒大使，我唔知香港人點睇，台灣嘅人因為起初估我唔會返過去，點知我去咗，我都感受到佢哋對我嘅尊重。我從未俾人叫過冧把，大家都叫我蘇先生。至於香港，我唔需要件事突然變做正面，好似懶叻咁。
記： 有人話你做錯事去負責係應該，但亦有評論話有人讚你係英雄，係刻意吹捧你？
康： 我只係盡一個人應有嘅責任，人哋觀點係點我冇辦法控制到，我今次件事唔係社會大眾應該學習，我話土城環境唔係咁差，唔代表大家就可以去fing頭，入去住番十幾日都冇事。我話我係病人，出嚟冇犯罪紀錄，唔代表我鼓勵你去fing頭，我相信人哋認同嘅，係我面對事件應有嘅態度，唔係件事，我又唔係做過啲可歌可泣事，我只係去負責。