美國聯儲局維持息率不變，但警告經濟傾向疲弱，為日後減息鋪路。美股借勢回吐，杜指跌2.4%，納指跌2.9%。
趙飛雲前日提過目前最怕美股調整，拖累港股欲升無力，噚日就即刻有辦睇。杜指升軌支持上升至8330水平，假如跌破，將進一步拖累港股。中移動（941）噚日公布中期業績，純利上升10%較市場預期佳，不過就冇息派，股價出現獲利回吐，收21.90元，跌1.6%。
技術上，中移動仍守20日線（現處21.40元）及短期升軌支持（約20.80元）之上，技術趨勢仍向好，暫視作短線整固，若跌近21元左右可博短線反彈。由基本因素睇，中移動預計PE約14倍，雖說並不便宜，但亦無大跌風險，不過要留意中國電信9月尾招股前，或會出現基金減持換馬。
百江燃氣（8132）噚日跌1個價位收市，收2.975元。二三線股氣氛欠佳，百江難免受影響，況且好消息公布後唔升，短炒業績者亦會獲利回吐，趙飛雲暫以2.875元作計數位持有，短期走勢若冇起色亦會先計數。
近排中資股跌得相當重，實力股如上海實業（363）等亦回近12元，現價PE9倍，估計再大跌風險有限，短線有博反彈價值，中線持有贏面更大。
趙飛雲