西都創意秋日料理
各老饕有無收到風，最近飲食界進行咗一次合併行動，就係一向走大眾化路線嘅橋本日本料理，個多月前已經同西都日本料理合併，合併之後有何搞作？當然有，第一擊就係幾間料理店嘅大廚親自出馬，設計出十多款自家創作嘅秋之料理，由時令日本海鮮做後盾，加上東、西洋配料同烹調方法嘅配合下，帶有Fusion味道嘅秋季料理，已經比秋天早一步登場。
記者：黃婉冰 攝影：陳偉強
ImageGirl：Betty（fromStarEasy）
雖然未正式踏入秋季，但食得嘅菊花已經爭先上位，這款由三文魚子、新鮮海膽、油甘魚三種不同地道海鮮組合成嘅「秋菊」，以三種海產的不同鮮甜味，拼湊出另一種新口味。當中所用到的海膽是夏季尾到秋天，在北海道當造的紫海膽，身形大，更加鮮甜是其特色，啱啱至開始有得食。
「秋之菊賣相好靚，好有創意，三種味道都好突出，首先係爽脆三文魚子，鹹鹹哋，跟住係海膽同魚鮮味，三種口感同味道，用料都好新鮮。」
雲丹即是海膽，向來以獨行俠姿態出現，但今次卻有「美」相伴，大廚搵「美國」牛柳相配，牛柳只用少量黑椒調味，再用極速將兩面表層煎熟，將肉汁鎖住，切成薄片捲起鮮海膽，效果令人耳目一新。
牛肉與海膽的口感表面看來雖有天淵之別，但同樣新鮮，所以兩種味道配合起來也不覺突兀。
唔好以為牛肋骨只得韓國料理先有，這裏同樣有燒牛肋骨，每條牛肋骨都規定6吋長，因為過長就會又有筋又多渣，過短又無肉食，大廚將筋位同脂肪部分都起埋出嚟分開燒，鍾意有𡁻頭可以連筋都食埋，燒前將肋骨浸一浸自製燒汁，多一份惹味。
「牛肋骨肉味濃郁，汁內嘅紅酒可以將牛肉味帶出，脂肪均勻甘香，比松阪牛肉更濃，好適合本地人口味，每條都有6吋長，好抵食。」
呍呢拿雪糕？炸雪糕？唔使估啦，呢個外貌同雪球一樣嘅其實係來自日本嘅新鮮溫室百合，大廚將百合打成茸，用大量百合茸包裹住雞肉粒、鮮蝦同烤鰻魚，搓成球狀用滾油輕輕一炸，再上木魚湯做的芡汁，屬關東口味，賣相精緻，味道偏於清淡。
佔大部份都是百合茸，入口似薯茸，嗒落有清甜百合味，夾雜住較味濃嘅鰻魚同雞肉，重有爽口蝦肉，食落無咁單調。
油甘魚魚生比一般的厚同大塊，除咗呢點之外，呢款沙律另一過人之處在於所用的沙律汁，沙律汁來自日本，當地人最鍾意在夏、秋料理中加入這種汁，由於用山葵根、山葵葉打茸加豉油調校而成，所以味道比普通的芥辣加豉油多一份山葵葉的清香，味道較淡，可以令魚生的鮮甜味盡情發揮。
「油甘魚好新鮮，好甜，上面嗰啲沙律汁味道好清，無咁鹹同濃味，芥辣味唔重，唔會將魚鮮味蓋過，但如果魚生再厚少少，咬落重爽口啲會更加好。」
金鎗魚腩甘香肥美，甜蝦鮮甜肉滑，大廚將兩大極品合二為一，創出這款金鎗魚腩甜蝦壽司，甜蝦是體形最大的一種，而金鎗魚腩會剁碎加入日本大葱碎，兩位主角的份量都調校得剛好，互不搶鏡。
金鎗魚腩茸入口依然肥美，滲有清香大葱味，對比起來，甜蝦爽口得多，兩種口感更有層次感，最好都係一個價錢食到兩種極品。
電話：23752929
地址：尖沙嘴山林道22-28號瓊林閣1、8及9號地下
座位：98個
營業時間：中午12時至下午3時，晚上6時至凌晨1時。
付款方法：現金及信用卡（Visa,Master）
備註：以上菜式同時於橋本日本料理各分店供應