減息期望落空，美股趁機調整，杜指散逾兩百點。昨日係近千家美國大企業確認帳目無誤嘅最後期限，聽講已簽誓章嘅公司至今未夠3百家，唔知美股昨晚有何反應。
港股昨日跟美股回落，恒指跌138點，睇嚟短線向下嘅機會大過向上，但向下水位未必好多，9600至9700應有支持，故此超短線可順勢買Put輪，落到去支持區就要轉揸Call輪。
近日玩輪好難贏錢，不論Call輪Put輪，溢價普遍收縮，買錯邊輸錢無話可說，但有時買中都冇錢贏。呢個情況，相信要等到大市突破上落市悶局，先至會改變，故此𠵱家炒輪，只宜細細注玩吓。
講番揀輪，超短線揀Put輪玩，最方便係向恒指Put輪埋手，起碼唔使諗隻正股會唔會有人死頂。恒指Put輪最多人玩嘅係9205同9287，分別在9月及10月到期，而溢價重有3%，時間值會消失得好快，唔係幾玩得過。較好嘅選擇係9314，現價52仙，11月到期，槓桿率係細啲，得4.6倍，但溢價1.5%唔會點縮。
喜歡成交多啲嘅可以揀9369，但溢價高些少。
章 盛